Aung Ko Htet (MM IT Knowledge)
အရင်တုန်းက Mercedes-Benzရဲ့ E Classအကြောင်းကို ကျွန်တော် မိတ်ဆက်ပေးခဲ့ဖူးပါပြီနော်၊ Luxuryတန်းဝင် မော်ဒယ် ဖြစ်ပြီးတော့ ဒီဇိုင်းပိုင်း ဆွဲဆောင်မှု ကောင်းတဲ့ အကြောင်းတွေ၊ အင်ဂျင်ပိုင်း သင့်တင့်တဲ့ အချက်တွေ ဘာတွေပေါ့၊ ဒါပေမယ့် အရင် ကျွန်တော် မိတ်ဆက်ခဲ့တာက ပင်မ မော်ဒယ်ခွဲ ဖြစ်တဲ့ E Classကိုပဲ ဖြစ်ပြီးတော့ အခုတော့ ကျွန်တော်က E Classရဲ့ လက်ခွဲ E350နဲ့ မိတ်ဆက်ပေးချင်ပါတယ်။ သူက အင်ဂျင်ပိုင်း အရွယ်ကြီးမားတယ်၊ နောက်ဆက်တွဲ ရလဒ် အဖြစ် စွမ်းဆောင်ရည် မြင့်မားလာတယ်၊ ဒါပေမယ့် ဆီစားနှုန်းတော့ များသွားတယ်၊ အရွယ်အကြီးစား ဆီဒင် အဖြစ် ဖန်တီးထားတယ်၊ နောက်ဆက်တွဲ ရလဒ် အဖြစ် အတွင်းခန်း ကျယ်ဝန်းလာတယ်၊ ၀န်တင်ဆောင်နိုင်မှု များလာတယ်၊ ဒါပေမယ့် Cityလမ်းကြောင်းတွေ အတွက် အနည်းငယ် အခက်အခဲ ရှိလာမယ်။ ဒီလိုပါပဲ… အပြစ်နဲ့ မကင်းပေ…ဒွန်တွဲနေတဲ့.. အဖြစ်တွေ ဆိုပြီး ကိုငှက်သီချင်းကို Copyလုပ်ပြီး ဆိုလို့တောင် ရပါသေးတယ်။ ကဲ..ထားပါတော့၊ ဘယ်လိုတွေ ဒွန်တွဲနေတယ် ဆိုတာကို တစ်ချက်ချင်းစီ ကြည့်သွားရအောင်ပါနော်။
ကျွန်တော့်ရဲ့ အကောင်းမြင်ဝါဒ…
------------------------------------
အရင်ဆုံး မြင်မိတဲ့ အချက်က အင်ဂျင်ပိုင်း ဖြစ်ပြီးတော့ ၃.၅လီတာသုံး V6အင်ဂျင်ကို တပ်ဆင်ထားတာကြောင့် စွမ်းဆောင်ရည်ပိုင်းက လုံလောက်ပါပြီ။ ဒါပေမယ့် V8အဖြစ်နဲ့ပါ ထုတ်လုပ်ထားတာက ရွေးချယ်စရာ ပိုမို များပြားသွားစေတဲ့ သဘောပါ။ နောက်ပြီး ကျွန်တော့် အမြင်အရတော့ V6အင်ဂျင်ပိုင်းမှာ ဒီဇယ်ဆီ စနစ်သုံးကို ပိုပြီး သဘောကျမိပါတယ်။ အတွင်းခန်း တည်ဆောက်ထားရှိပုံ ကောင်းမွန်တယ်၊ လုံခြုံရေး စနစ် ဆိုင်ရာ Featureတွေ စံမီတယ်၊ များပြားတယ်၊ ဆီဒင် တစ်စီးအတွက် လုံလောက် သင့်တော်တဲ့ တပ်ဆင်ထားရှိမှုတွေ တပ်ဆင်ထားတယ်၊ အပူပေးထိုင်ခုံစနစ်တွေလည်း တပ်ဆင်ထားတယ်၊ Autoစနစ်နဲ့ ဖြစ်ပေမယ့် အရှိန်မြှင့်တင်မောင်းနှင်နိုင်မှု ကောင်းမွန်တယ်။ နောက်ပြီး V6အင်ဂျင်တပ်မှာရော၊ V8အင်ဂျင်တပ်မှာပါ သင့်လျော်ကောင်းမွန်တဲ့ ဆီစားနှုန်း တွေ့ရတယ်။
ကျွန်တော့်ရဲ့ အဆိုးမြင်ဝါဒ…
--------------------------------
တခြား ဈေးကွက်ဝင် ပြိုင်ဖက် ကားမော်ဒယ်တွေနဲ့ စာရင် ဒီဇိုင်းပိုင်းက Sportမဆန်တာကြောင့် ရုပ်ထွက်ပိုင်းက အားပျော့တယ်လို့ ထင်မိပါတယ်။ နောက်ပြီး V6အင်ဂျင်တပ် မော်ဒယ်အတွက် ပျမ်းမျှ ဆီစားနှုန်းက ဆီတစ်ဂါလံကို ၂၅မိုင် ဖြစ်နေပေမယ့် တပ်ဆင်ထားတဲ့ ဆီတိုင်ကီက ၂၁.၁ဂါလံ ဆံ့တယ်ဆိုတော့ နည်းနည်း ကြီးနေသလိုပါပဲ၊ ကျွန်တော့် အမြင်အရတော့ ဆီတိုင်ကီပိုင်းကို နည်းနည်း သေးပြီး နောက်ဖက် ၀န်တင်ခန်းကို ပိုကျယ်အောင် ဖန်တီးသင့်တယ်လို့ ထင်ပါတယ်။ နောက်ဆုံး တစ်ချက်က အရှိန်မြှင့်တင်မောင်းနှင်နိုင်မှု ဖြစ်ပြီးတော့ E350ရဲ့ အရှိန်မြှင့်တင်နိုင်မှုက ပုံမှန် အနေအထားပဲ ဖြစ်တာကြောင့်၊ ဒီထက် ပိုမို ကောင်းမွန်တဲ့ အရှိန်မြှင့်တင်နိုင်မှု ဖြစ်သင့်တာပဲ ဖြစ်ပါတယ်။
မျက်စိရှေ့က အပျိုကြီး…
--------------------------
ခေါင်းစဉ်လေးကို တစ်မျိုးတစ်မည် ပြောင်းတပ်ထားလို့ အံ့သြသွားပါသလား၊ တစ်မျိုးတော့ မထင်လိုက်ပါနဲ့။ ဒီလိုပါ၊ E350က အရွယ်အကြီစား ဆီဒင် ဖြစ်တာကြောင့် လူတွေလို ဆိုရင် အသက်သုံးဆယ်ကျော် Sizeဖြစ်သွားတာကြောင့် အပျိုကြီးလို့ ဆိုလိုက်တာပါ။ အင်း..ဆက်ပြောရမယ်ဆိုရင် ဒီအပျိုကြီးမှာ One Set အကျီင်္က လူကြိုက်များတဲ့ အနက်ရောင်၊ ငွေရောင်၊ အဖြူရောင်တွေ အပါအ၀င် စုစုပေါင်း ၁၇ရောင်ထိအောင် ရှိတာကြောင့် တစ်မျိုး မကြိုက်ရင် နောက်တစ်မျိုး စိတ်ကြိုက်ရွေးချယ်နိုင်မှာပါနော်။ အဲ…ပြီးတော့ တိုးတိုး တိတ်တိတ်ပြောရမယ်ဆိုရင် အတွင်းပိုင်းက သားရေ၊ အထည်၊ Plasticဦးစားပေးတွေ အဖြစ်နဲ့ ဖန်တီးထားတဲ့ ဒီဇိုင်း ၉မျိုး ရှိ်သေးတယ်ဗျ…နော။ အလုံးအထည်ကလည်း ကြည့်ဦးလေ၊ အလျားက ၁၆ပေကို သုံးစိတ်ပဲ လျော့တယ်ဆိုတဲ့ အတိုင်းအထွာက နည်းလားဗျာ၊ ပြီးတော့ မျက်နှာစာ အကျယ်က ၆ပေနဲ့ ၁လက်မ၊ အမြင့်က ၄ပေနဲ့ ၁၀လက်မကို တစ်စိတ်လျော့ ဆိုတာတွေက မျက်စိထဲ မြင့်ကြည့်စမ်းပါဗျာ၊ ဒီ အပျိုကြီးက တောင့်တောင့်တင်းတင်း၊ ဖြောင့်ဖြောင့်စင်းစင်းကြီးဗျ..နော။ ကိုယ်ထည်နဲ့ မြေပြင်ရဲ့ ကင်းလွတ်နိုင်မှုက Luxuryဆိုတော့ ပမာဏနည်းတယ်၊ ဒီတော့ အပျိုကြီးက နုနုလေးပဲ နေမှာနော်၊ ခယောင်းလမ်းတွေကိုတော့ မလျှောက်ရေးချ၊ မလျှောက်ပဲ။ အတွင်းခန်းတွေက ရှေ့ဖက်ခန်း ၅၈လက်မနီးပါးနဲ့ နောက်ဖက်ခန်း ၅၇လက်မ နီးပါးတွေ ဖြစ်ပြီး အပျိုကြီးရဲ့ အလေးချိန်က ပေါင် ၃၈၀၀ကျော်တာကြောင့် အစားကြီးမယ့်ပုံပါပဲ။
အပျိုကြီးရဲ့ ခြေလှမ်း…
------------------------
ကျွန်တော် ပြောတဲ့ အပျိုကြီးက လူကောင်သာ ကြီးတာ စိတ်ကတော့ မြန်တယ်ဗျ။ ၃.၅လီတာသုံး V6အင်ဂျင်ကို တပ်ထားတာ ဖြစ်ပြီးတော့ လည်ပတ်အား ၃၅၀၀မှာ ရုန်းအားက ၂၇၃ပေ-ပေါင် ဆိုတာက ပုံမှန်ထက် နည်းတယ်လို့ ထင်ရပေမယ့် စွမ်းအင် ထွက်ရှိမှုက မြင်းကောင်ရေ ၃၀၂ကောင်အား ဆိုတာကတော့ အပျိုကြီး ဘယ်လောက် ခြေလှမ်းသွက်မယ်ဆိုတာ ရိပ်မိစေပါတယ်။ အင်ဂျင်ရဲ့ အမြန်ဆုံး လည်ပတ်နိုင်မယ့် နှုန်းက တစ်မိနစ်ကို အပတ်ရေ ၆၅၀၀ဆိုတာကတော့ နည်းနည်း များသလိုပါပဲနော်။ နောက်ဘီးယက် စနစ် ဖြစ်ပြီးတော့ Transmissionအပိုင်းက Autoစနစ်နဲ့ သွားမှာ ဖြစ်သလို စုစုပေါင်း သုံးနိုင်မယ့် ဂီယာချက်က ၇ချက် ဖြစ်တာကြောင့် နယ်ဝေးသွားလာမှုတွေ အတွက်လည်း အဆင်ပြေစေနိုင်ပါတယ်။ အမြန်နှုန်း မြှင့်တင်မောင်းနှင်နိုင်မှုနှုန်းက တစ်နာရီ မိုင်၆၀နှုန်းကို အချိန် ၆.၅ စက္ကန့်ပဲ ဆိုတာက Autoစနစ်နဲ့ သွားတဲ့ အပျိုကြီး အတွက် ခြေလှမ်းသွက်တယ်လို့ ဆိုနိုင်တဲ့ အနေအထားပါ။
အပျိုကြီးအတွက် မိတ်ကပ်ဖိုး…
--------------------------------
ခန္ဓာကိုယ် လှလှ၊ ခြေလှမ်း ကြွကြွ အပျိုကြီး အတွက် မိတ်ကပ်ဖိုးငွေကတော့ မကုန်မဖြစ်ပါပဲ၊ ဘာဖြစ်လို့လဲ ဆိုတော့ အပျိုကြီးက အလှမက်တာကြောင့် မိတ်ကပ်မှ မလိမ်းရရင် တစ်လက်မတောင် မရွေ့ဘူး ဆိုတာကြောင့်ပါ။ ဒါပေမယ့် တစ်ခုကောင်းတာက အပျိုကြီးက မိတ်ကပ်ဖိုး ငွေများများ မတောင်းတာပဲ ဖြစ်ပြီးတော့ သူ့က မိတ်ကပ် တစ်ချက်ကို ပျမ်းမျှ ၂၅မိုင်လောက်ထိအောင် သွားမှာပါတဲ့။ Cityအတွက် ဆိုရင် မိုင်၂၀နဲ့ Highwayအတွက်ဆိုရင် မိုင် ၃၀ထိအောင် သွားမယ်ဆိုတဲ့ နှုန်းကတော့ တော်တော်လေးကို စိတ်ဝင်စားစရာပါနော်။ တပ်ဆင်ထားတဲ့ ဆီတိုင်ကီကို ကြည့်မယ်ဆိုရင်တော့ စုစုပေါင်း ၂၁ဂါလံကျော်ထိအောင် ဆံ့ဝင်မှာ ဖြစ်တာကြောင့် ပြောခဲ့ပြီးသလို တိုင်ကီက နည်းနည်း ကြီးနေသလိုပါပဲ။
အပျိုကြီးရဲ့ သစ္စာ…
---------------------
သစ္စာနဲ့ တူတဲ့ ယုံကြည့်စိတ်ချရမှု အပိုင်းမှာတော့ အပျိုကြီးက အမှတ်ပြည့်ပါပဲ။ တစ်ယောက်ဆို တစ်ယောက်၊ ပိတောက်ဆို ပိတောက်ပဲလို့ ဆိုနိုင်လောက်အောင် ယုံကြည်စိတ်ချနိုင်တာ တွေ့ရမှာ ဖြစ်ပြီးတော့ ဘရိတ်ပိုင်းမှာ ABSစနစ်ကို တပ်ဆင်ထားသလို အသက်ကယ် လေအိတ်စနစ်အပိုင်းမှာလည်း ရှေ့ခန်း ဘေးဘက် အသက်ကယ် လေအိတ်စနစ်၊ ရှေ့ဖက် တင်ပါးဆုံပိုင်း ဆိုင်ရာ အသက်ကယ် လေအိတ်စနစ်၊ ဘေးဘက် အသက်ကယ် လေအိတ်စနစ်နဲ့ ယာဉ်မောင်းဆိုင်ရာ ဒူးခေါင်းပိုင်း အသက်ကယ်လေအိတ်စနစ်တွေ ပါဝင်တာကြောင့် အပြည့်အစုံပါပဲနော်။ Stabilityနဲ့ Tractionတို့လို အကူစနစ်တွေလည်း သုံးနိုင်မှာ ဖြစ်သလို သက်တောင့်သက်သာ လိုက်ပါစီးနင်းနိုင်ဖို့ အတွက် Cruise Controlလို စနစ်လည်း တပ်ဆင်ထားပါသေးတယ်။ ဘရိတ်ပိုင်း ထိန်းချုပ်ရပ်တန့်နိုင်မှုကို ပြောရမယ်ဆိုရင်တော့ တစ်နာရီ မိုင် ၆၀နှုန်းနဲ့ သွားလာနေရင်းကနေ ရပ်တန့်မယ်ဆိုရင် အကွာအဝေး ၁၂၁ပေ ယူမှာ ဖြစ်တာကြောင့် နည်းနည်းလေး များပါတယ်။ ဒါပေမယ့် E350 4Matic Wagonကတော့ ၁၀၉ပေပဲ ဖြစ်တာကြောင့် ဒီအပျိုကြီးကတော့ ခြေမများဘူးလို့ ဆိုရမှာပါ။
ref: လင်းထက် (IA)
0 comments:
Post a Comment